Na kraju godine obično činimo konte, mislimo kako još malo i godina će finit, pitamo se ča smo učinili kako triba, a di smo falili. Još malo i finit će i ova. Meni je bila prosječna, nije mi se dogodija nikakav spektakl, nisan dobila na loto, nisan našla boršu para, nisan bila na put oko svita, nisu mi se nekin mirakulon riješili svi problemi sami od sebe, ali sam sritna i zadovoljna, zahvalna ča san živa i zdrava i to bi ka bilo to. Radin svoj posal, nastojin slušat ministra, onega ča je od policijota, e, i gledan ne ostat doma nego svaki dan uvatit malo arije, protegnit noge. Otvaran ponistre, peren ruke, temeljito, e. Tepla vodica i sapunčić. Triba izdurat ovo vrime i maknit se ča od svih konfužjuna, živit tiho, mirno, skromno. Ne mislit o onome ča nas nervira, veselit se sitnicama. Čitan, gledan filmove, javin se dragin ljudima, popričan s kumpanjima kad ih trefin, šta ti više triba?
Još malo ove zime koja kod nas i nije neka zima i ide lito. Neš se ošervat i skačemo u more. Zaradi tega laganini sa spizon, ono, da se ne gomilaju kili, a ako ne znate kako koju učinit, evo ovo koja ricetica, provjereno je dobro sve tu notano, bakalar, rižot, brudet, riblja juva, riba lešo, fritule itd. Ekola, gren ča, zdravi i veseli bili, notat ćemo još štagod u ovoj, a i dogodine, pa povirite ovod jopet.
Nema komentara:
Objavi komentar