e... sutra je fjera svetoga duje, ali te fjere na žalost ni ove godine neće bit zaradi nesritnje bolešćine koja je strefila tutokompleto zemaljsku balotu.
lani smo nekako i izdurali, ali sad nan je već pomalo počelo falit sve, od procešijuna do svih onih banki ča bi se naredali na rivi i prodavali potribne i nepotribne sitnice.
rokete navečer su ipak u programu, a o' procešijuna ništa.
a sitite se samo kako su se iz armeruna vadili oni mrvu bolji bokuni robe za ti veliki dan jerbo triba se poč do grada sa puno šesta.... domaći, furešti, vižitari, svi bi u split arivali... onima ča se nisu sitili malo obisit robu na višalicu na frišku ariju je roba vonjala na lavandu u boljen slučaju, a u goren na naftalinu. košulje su morale bit pomno i s pacijencon šumprešane, ništa škicano, ko je to vidija poč škican na fjeru?! španćjera za prvo litnje sunce na ćiverici pod obavezno, a na svakin gačama riga je morala bit po pravilu izvedena ka i pjete na ženskin suknjama.
postole su se obično vadile fine, one ča nisu za svaki dan, a narafski, ka za pegulu, baš na ti dan su morale počet dodatno tiščat, žuljat. ka mali bog za zidić na rivi, koju šentadu oli katrige u kafićima, sidi, fermaj malo, odmori noge i postole, neće procešijun uteč, gre on polako, laganini, s noge na nogu, jušto da možeš ugledat baš svakog popa i baš svaku švoru, pa onda soldate, mornare, alkare, izviđače, razne udruge i na kraju njih pripametne i beskrajno poštene političare. svake godine bi utrnila snimanje kad bi oni došli na red, a mirakul jedan kako im ništa ne bi bilo kjaro i kako je svaka šempja mislila da je procešijun za nju učinjen i da se svit skupija da baš njoj svon forcon maše. moš mislit, ke imbečile....
fali mi taj šušur pun bandira i montura, a fali mi i vazest koju drvenu žlicu, lazanjur (to jema svaka poštena žena i to ih jema nikoliko), koju daščicu za sič kapulu i petrsimul oli učinit pešt ka' je u teči paštafažol, koji kapelin, boršu, dinđu, pitar, kesicu lavande jerbo normalan svit to stavlja u armerun, a ne onu naftalinu od koje možeš past u nesvist kako grubo vonje.
nego kad smo već kod vonji, fali mi i vonj lipoga cvića ča bi ga cvjećari tako lipo i šesno složili u dioklecijanove podrume, a fali i vonj boba kojega ću učinit ovih dana ka i svake godine jerbo ionako nikad nisan išla izist ništa od one spize ča se mišala u veliku teču učnjenu u škveru na peškariji.
je li van fali kupit kartelu? nadat se barenko cinkvini?! od jutra do pozapodne virovat u svoju malu dobitnu kombinaciju koju narafski teško u splitu možeš dobit jerbo su je baš uvik dobili bročani i vlaji.
je li van fali zvuk klepetala koje bi dica gurala doma, svako dite koje je reslo u splitu je barenko jedan put u životu bilo darovano ton igračkom, kupija bi mu neko već, baba, dida, mater, otac, susid. šta mislite, šta se kroza godine dogodilo sa svin tin klepetalima ča su se mogla nač po spli'skin kućama, obično na armerunima? a falili van zvuk svirka na vodu? i komentiranje vešte poteštatove žene jerbo je ona puno interesantnija od komentiranja poteštatovog veštita... a koncert, mladost, šušur, veselje, smij?! ćakula? uživo, a ne na tu niki zoom, viber i slično. da vidiš čoviku joči lipo i nasmiješ se s kumpanjima pošteno. ćokneš prvu trišnju oli poližeš đelato?
ben ti i miša i šišmiša, pogotovo onega potopira i onega ča je bija incukan i to izija... finit će i ovo ka i sve.
strpljen spašen, čuvajte se, sveti duje čuvaj ovaj naš lipi i ludi grad.
Nema komentara:
Objavi komentar