prvi maja

nekad smo prvi maja slavili izletom. obično je to bija izlet na broč i to do prvog porta, supetra ako se odilo sa skulom oli u radmanove mlinice ako si iša u svojoj režiji. pocrvenija bi ka rak jerbo su to bila prva banjanja, a sunce nije imalo milosti prima dičjoj kožici. poslin si se mora ličit jogurton. zapravo je nešto ča je tribalo bit lipo, postalo bolno.

spiza je isto bila važna, pa te tokalo izist pečene janjetine ili pastrve, a prethodno si ih gleda žive isprid sebe. 

sve to narafski u spomen na borbu za radnička prava.

ako te bilo volja, moga si poč i slušat govor kojeg političkog. ono, pro forma, taj se uvik borija za svoja prava i svoj takujin, a iskreno govoreći, za tebe mu se čovik moj frigalo, friga i frigat će se. friga, e... ka papaline u pršuli. eto tako, e... a šta si mislija? da te puno voli? da je lud za tebon? da je tot iz ideala? iskrene želje da svaki čovik jema život dostojan čovika?

meni je nekako uvik bilo žaj malog bidnog  janjca i sad ih više ne jeden. moren i bez toga.

u nikakve demonštracijune za tuđe interese ne gren. nisan odila na merjan ni na peristil.

bila san doma i oni mobitel ča je moderni žveljarin i ča mi je u pet i po uri jutros učinija prvomajski uranak jer san ga zaboravila isključit san potegla da ne piva više.

ubila san oko barenko još uru. je li prvi maja ili nije, a? ono da se pošteno naspavan i odmorin jerbo ja to zaslužujen poza cile godine napornoga rada. 

je, i ja radin, ši. nije samo kopanje i pranje konduta rad. o proizvodnji u rvackoj je suvišno govorit kad je jemamo za izvoz, pa se tičen kopanja. neko pak radi i sa sadržajen svoje ćiverice, a ne samo mašklinon. malo nas je, al' nas ipak  ima. 

za obid san izila domaće njoke i šug od gljiva. bija je to odličan, prvomajski obid za koji me nije tokalo stat u filu  i gledat čunke pulitičara koje bi najrađe pljunila. onako kako su oni pljunili po ovoj zemlji i njenon čoviku, e...

izila san i čokoladni kolačić kupljen na akciji ka i gljive i ka i kumpliri i brašno od kojih mi je mater učinila njoke.

makinja mi je oprala robu (ovo znači da fala bogu jeman letrike), a ja san je stavila sušit. prije njoka. poslin njoka je bilo na redu varenje obida tj malo odmora. ovo je moj neradni dan poza ne znan koliko radnih i poza ne znan koliko odrađenih državnih praznika. kako niko to nije cijenija, a takujin mi nije bija deblji, izborila sam se za svoja prava i šempre rekla šefu dok san se gledala u zrcalo: za državni praznik više ne radin. jok.

ka šta nisan izila janjca tako nisan otišla ni na more da ne izgorin. za umorne noge dobar je i kajin i sol iz mrtvog mora kupljena na akciji, narafski. 

sutra radin. za bolje sutra, narafski, a najviše ću narafski mislit na sebe jerbo san dosad prikovišje mislila na druge. 

sad učin. na online tečaju. jerbo, #znanjevrijedi ono me hrani, a ne partije i političari i njihovi isprazni licemjerni govori.