siti se šta tražiš

e... izlazin ja iz tommya ča je kraj solurata sva sritna jerbo san veliki važ biži našla po 4 kune i baš se mislin kako će biti dobri riži-biži od tega, kad eto ti dvi furešte, mlaje, bjonde, pomalo pigave.

- do you speak english? - reče jedna

- yes - rečen ja i počne moja muka.

pita ona mene da bi li ja njoj mogla reč kako će ona nač 'otel. a mogu rečen ja i pitan je da koji joj 'otel triba. ne zna. asti sto šta ćemo sad, a? neće one u bilo koji 'otel, vengo su se one već smistile u neki 'otel, ali se ne mogu sitit njanci kako se zove, a kamoli koju ulicu traže. izvadin ja mobitel, pa joj rečen da san za nju učinila stranicu i kartu i počnen joj pokazivat spliske 'otele u nadi da će se sitit ča traži. jednega po jednega. prvi, drugi, treći i tako svi. nije ni jedan. onda je zaključila da su oteli preskupi da je ona prije išla u hostel, vengo u hotel, ali se i dalje ničega nije mogla sitit. počnen ja nabrajat spli'ske hostele, barenko ove veće, poznatije, a ona je počela spominjat apartmane. muke ti iskukrstove, samo ih u split jema oko dvadeset iljada. već se mislin da je odveden u TZ oli policijotima, pa da oni nekako probaju nač di je prijavljena. je, baš, ma ajde mala lovi rake govnare reka bi joj moj pokojni dida, ali mene sve straj da će ona negdi zaglibit i da bi joj se moglo ne daj bože štagod dogodit. pokušavan joj pomoć. na kraju je pitala di je stari dil grada, to san joj rekla i zadnje san ih vidila kraj fife, tu su po svemu sudeći srele ostatak ekipe, neko će valjda znat u kojoj su državi i gradu.

eto zašto svako dite triba poč u izviđače. mene je tamo odma naučilo snalaženje, orijentaciju, pamćenje bitnih objekata, čitanje karti itd. ovo je nevjerojatno, eto njih u europu, to je najvažnije, a njanci ne slikat tabelu od unajmljenog smještaja. kako san to promislila, vidin jednu stariju fureštu kako upravo to čini, slikaje tabelu, da zna ako se izgubi kako se zove ulica i ti apartman, hostel, hotel, palača ili šta već, e... godine donose mudrost. mlado, ludo, pijano i drogirano i bog čuva. kad svu forcu potroši na takve, za me mu ništa ne ostane, pa se ja moran čuvat sama. i mislit šta ću i kako ću. aj gren nastavit mislit na riži-biži, bit će to prva liga, e...