ironično

e... kako je samo trka, ka zec, a? ovo san ovod stavila sa svrhon i razlogon, onako ironično, e... 

oštrigucan ja tako iz foja i koji litrat na kojemu je koja čunka iz politike, pa ga zalipin u kondut. isto ironično, e... dok gledan u ti litrat, štumik mi odma bolje radi. 

kad ih zalipin u kondut, odma se zna da in je vlast gotova. 

finito, ekola. 

eto tako pa ako očete znat ko će izgubit vlast, morate doč u mene i triba van doč pišat, e... 

vargula o' konduta je jedan stari spli'ski izraz za one ča vole kakit na justa. da ne buden ta, reč ću da kakit triba na gujicu. i pišit isto priko organa za piškenje. nikidan na tv reče đuke, ona ča je osvojila kolajne na olimpijadu, da bolje zvuči pišat. more bit i da jema prav, e...

za dobar rad tila važno je i trkat. činit fiskulturu.

nekoliko đireva oko merjana, pa onda malo do matejuške i nazad. 

ka bačo, e... bit brži od ferate. 

osin za zdravlje, dobro more doč i lupežima i ticama varalicama kad ih jedan dan bude tokalo bižat. priko granice, e... pustit crno ka sipa i uteč u sigurnu zonu.

najlipje mi je sad u proliće vidit spli'ske ridikule kako trču. muške i ženske. dura to već godinama jerbo kriza tih srednjih godina dura već godinama, dulje od rvacke gospodarske krize kojoj nima ni početka ni kraja, pa se onda gre na trkanje oli na bičikletu. triba se dokazat sebi i selu da su su mladi, lipi, poželjni. skinit kile.  bela, belisma. moš mislit.

stave i znojnicu oli kakvi šudar, pa odma misle da su koji  proslavljeni tenisač oli drugi sportaš. muški obuču utegnute gače, ono, ka da su došli plesat labuđe jezero u teatar. je ih lipo vidit. neki i moredu malo istrkat, neki pušu i mislin da će ih kolpat, da će in tribat zvat hitnu.

moren pritrkat cili merjan i to s tereton na leđima, često to i učinin, ali ne činin cirkus apropo tega. moren plivat satima i to često činin, pa i jopet ne mislin da san veljko rogošić. rekreacija je jedno, cirkus drugo. 

eto tako, pa ko ne želi bit opisan na ovi blog, neka mi ne dolazi trkat na oči. jerbo jeman joči da gledan. i uši da slušan . i mozak digod promućkan, pa ga duperan. kjaro mi je šta ko čini, ko šta oče, a kako cili život čitan, znan i notat besidu dvi, onako i 'vako (ovo da me razume i nesplićani). kako? ironično, e...

ekola, ko se nađe uvređen i povređan, neka me tuži. gren ča. jemate pozdrav!