končar je to

e... dida mi je još bija živ i u snazi kad me posla s vodoinstalaterom u butigu da kupin bojler. ne vraćaj mi se bez lipoga bojlera. gledaj kvalitetu. da nisi kupila kakvu škovacu, e... partija je moj dida 2000. godine, a moj bojler dura, ono, da se kucnen u drvo. znači nisan kupila škovacu. 80 l, končar, onda oko 800 kn. nikad ga nije tribalo skidat sa zida ni čeprkat po njemu, češat prste staklenon vunon i tako to, a na zid postavit i spojit letriku san narafski pomogla meštru. jerbo, ja san uvik tamo di triba radit, e... danas je poza svih tih godina tribalo i jopet radit. više ja nikakvin meštrima ne dan njanci 100 metri blizu kuće, a kamoli u kuću. šta će mi, a? da mi sve šporkaju i ne naprave ništa, e... zoven jedino vodoinstalatera jerbo nije se s vodon zahebavat, možeš učinit poplavu i jedan dan kad bude pinezi, zvat ću keramičara. pituri, maranguni, a posebno letričari (hehe) nemaju šta kod mene tražit. to sve napravin sama i ušparala san tako iljade eura. narafski, ko ne zna da se zid triba ako je potriba sastrugat, očistit, pogletat, proč karton deveron, ko je kilav, pa more past sa skala, ko me se manta i tako to, a pogotovo ako je neko kronična linčina, bolje da zove meštra. stan od priko 70 m2 san već nikoliko puti piturala. radila san stropove, zidove, vrata, ponistre, ulazna vrata, pa čak i i ogradu od balkona, e... vidi kako se bojler bili, ka snjeguljica, e... eto san ga piturala sa svojih deset prstiju pituron koju san jutros kupila za 16,90 kn. fala muškima ča su isprid ekonomske skule pituravali ogradu u bilo. pitan ja: a di ste kupili bilu pituru? tražin već neko vrime malo pakovanje za piturat bojler, a nima. eto tu blizu, u dubrovačku. fala rečen ja, eto me za pet minuti u butigu, kupin mali važ, prođen još priko grada, peškan koju sliju oli po spli'ski litrat, stavin ih na net, obidvan, odmorin, prođen bojler karton deveron, poslin pituron i eto, ka ča se da vidit snjeguljica. pineli, valjak i prsti su već čisti, terpentin nije proliven u lavandin, neka se suši i dura još puno godina. oče, končar je to. fala ča pitate, piturala san mu i krov. i fala ča pitate, sama san sastrugala i štrop o' zahoda, toka me pogletat to, pobrusit, piturat, jema posla. narafski da mi niko neće smetat, to ću ja sve sredit, već 3. put otkad je dida partija. zahod oli po splisku kondut triba češće pituravat od soba oli po splisku kamara i to je to. ekola, gren ča, triba malo pružit kičmicu, nije baš lako bilo visit ka šimija :)