e... link vodi na zadnji dil. nastavljamo. a šta ste mislili da je kraj, a? ma di će bit kraj, pa ta tema je neiscrpna, šta bi rekli vječna inspiracija je tot, e... za dil šesti me inspirira jedan puno poznati splićanin, moran van odma reč da to opće nije ni bitno, na isti način će se ponašat i nepoznati, mlađi, stariji, bogatun, siromaj, ma sve to gre pod zajednički nazivnik dalmatinac tipični, e... ovi je, eto, nikidan činija takve monade u jednu ambulantu o' opće prakse, pa mi je palo na pamet da nikako nije loše na ovi internet notat o' temu kakvi je to dalmatinac tipični kad gre u likara, e... ono, neka to zna cili svit, e...
ako je tipični, njemu se u likara puno, puno teško uputit i radije će trpit bolove i gucat sve moguće muke, vengo poč u ambulantu. boji se zubarske bušilice, trta ga je o' vađenja krvi, straj ga je balance, boji se svega ča jema veze sa zdravljen i likarima i da ga ne daj bože toka rodit dite brzo bi izumrli dalmatinci, e... šta van s ovin oču reč? e, ovo van oču reč da kad vaš primjerak o' vrste (momak, muž, brat, ćaća, dida, svejedno svi jemaju isti mot oko ovega pitanja) puno boli, morate vazest onu slušalicu o' telefona u ruke i same nazvat ambulantu jerbo on to neće, a i ne zna učinit, e... straj o' likara je jači o' njega i o' ikakvoga razuma i ako mu vi ne dogovorite njegovu uru za pregled, on se nikad neće tamo zaputit, prije će krepat, vengo tot poč, e... molin vas da ovo svatite krajnje ozbiljno jerbo je tako kako je i tot likarije nima.
e sad, kad ste mu dogovorili njegovu uru, bilo bi najbolje da ako morete pođete š njin u tu nesritnu ambulantu. narafski, morat ćete i dušu ispustit da obuče čistu sokolsku, mudante i bičve. baš ti dan mu je još uvik dobro sve o' jučer i vjerojatno ćete oko tega da gre u čistu bjankariju uložit dosta force, i previše, e... nemojte baš inzistirat da patina posotle jerbo bi to moglo prilit pjat, e...
ako ne morete poč š njin, nekako će još poč i sam, ali je velika vjerovatnost da će tot učinit sto i jednu monadu. šta sve, a? a to se nikad točno ne zna, ali morete očekivat da će u čekaonici lajat sa poznatin i nepoznatin sviton, more vas i dobro izogovarat jerbo ste ga poslale tot, more olajat likare, more mu past na pamet olajat i državu, ma svašta, e... narafski, more bit da oko nikih stvari i ne bi puno falija, ali znate onu koga je molit nije ga idit, e... kada dođe na red, poželjno je da ga niko utira u tu nesritnu ambulantu. a šta bi sve moga izvest unutra, kod likara, e, o' temu neću njanci mislit. narafski, isprazno blebletanje će se nastavit i kod vađnja krvi, a tot morete čut i urlike ka da ga ko kolje.
inšoma dela šoma oli sve u svemu, kad konačno napusti ti prostor, more laknit svima ča su ga tot gledali i slušali, o' medicinara, pa do svita ča čeka filu, ali vi ste sad na sto muka. zaradi čega? a ča me to pitate, oli ne znate da će kad ariva doma, jedno dvi do tri ure (minimalno) ladit zube i pričat ča su mu sve bidnome tot činili, rekli, pa sve do tega koga je tot trefija. narafski, sve će to morat slušat i ako ste bile š njin u tu ambulantu, e...
eto, kad gre kod likara, to je događaj za koji triba jemat puno force, e.. a morete li vi sve to svaki put progucat, a? a ko vas, zapravo, pita morete li oli ne, to je tako i pari mi se da godine prolaze, da se generacije minjadu, ali da nike stvari ostaju iste, e...
gren ča, jemate pozdrav!
by xvii , notano 23.02.2006.
nastavlja se, narafski
Nema komentara:
Objavi komentar