e... stali smo tot. narafski, danas se štorija o dalmatincu tipičnom nastavlja. gremo hrabro naprid, e...
zanimljivo je, i to vrlo, da se dobra većina njih, iz meni zasad nepoznatih i neutvrđenih razloga, voli uvlačit u kužinu, e... tako da ako ih vidite sa traveršon na njima i da in je kacijola u ruke, nemojte ostat paf. nemojte ostat deštuko, kažen još jedanput, mora bit da in je to u genima, e... mislin i da je priljepčivo, a karanja kako se šta kuva i ko je bolji kogo su također česta, skoro pa i svakodnevna.
i sad da je to vapor pa bi reka čovik, žensko tot nosi nesriću, pa jemamo i koga, e, ali doma, u kužini di mora jema samo na sliku i ako pogledaš kroza ponistru, e to, to mi nije kjaro, e... znan, sve znan, sad će niki reč da šta fali da muški kuvaju, da su pusti muški kuvari čak i svitski priznate i poznate čunke, da ženi triba pomoć, e, itd. sve za 5 i to 5+, e... ne minus, brez minusa, sa pluson, e...
no, kakva je to pomoć kad je naš lipi i šesni dalmatinac tipični u kužini obično neredan, a? on će brez problema izvadit najveću teču iz kredence i tot stivat na lešavanje jednu jedinu tikvicu. sa šalšon o' pomidori je kapac mačat sebe (ni traverša mu neće pomoč), pločice, cilu kužinu, po tleju i po stropu, e... vrlo često će i razbit koji pjat oli čašu, a zaradi svoga nedjela neće opče ćutit grižnju savjesti. još ćete vi bit krive kad budete pokušale bokune cakla utirat u škovaceru; lipo će van reč da šta mu se muvate ka muva brez glave oko nog i šta ga dekoncentrirate dok on kužinaje. nakon svih muka po njegovon kuvanju tokat će vas i falit njegovu kužinu, a šta se zna dogodit da u šug utira cili važ konšerve, nikon ništa, e...
s vrimenon će naučit kuvat, a redu i urednosti će se teško ikad naučit (klanjan se urednima, e). e, sad ja vas pitan, a je li vi to morete izdurat, a? meni se nikako pari da je tega dalmatinca tipočnoga najbolje ne puštat njanci blizu kužine, e... jerbo, puno je posla poslin te pomoći, e... i previše.
narafski, neka mi se ne šticaju oni ča im je ponašanje u kužini čista kontra o' ovega, e, ma malo je takvih.
znan da će mi zaradi ovega teksta zvonit mobitel, da će bit e-mailova u škrabicu, da će bit: kako ti to moreš nas crnit na oni internet, ma ko je to vidija, a? zaradi prva dva teksta je već bilo tega, e... čak su niki i na svojin blogovima notavali posebne postove koji su tribali bit ka meni za kontru ( to su činili jerbo je karanje dalmatincu spiza za dušu, e)
uzalud van, istina o vama se triba reč svitu i ja neću činit kuco, a jok... ma znate šta, evo za koji dan će ići još jedan tekst iz ove serije, pa onda spojite beštimije, e... a šta ćete dva puta trošit pineze, a? bolje je za njih kupit koje izdanje najnovijih riceta, e... je li tako, a?
----------------------------
by xvii 13.10.2005.
Nema komentara:
Objavi komentar