*****

kako do pinezi bez rada? nedavno sam pisala, ponavljam za one koji nisu čitali. i da sve sam te pineze uplatila, bez prava žalbe...
------------------------------------
e...
najprvo mi je pauk diga tonobil. nikakvo čudo, diže pauk tonobil svaki dan, sad će neko reč.
e ma moj tonobil je dignut s parkirališta.
onda mi je pošćjer donija leteru od policijota di piše da je tonobil bija na pješačkon prijelazu.
tot su i notali da im ka diretur firme moran reč ko je tonobil vozija, a ako in ne rečen, pritili su mi sa 2000 kn kazne.
ja san kažen ja vozila, ali san tonobil zaparkirala na parkiralištu, a ne na pješačkon prijelazu.
onda mi je jopet pošćjer donija leteru di su me optužili da san nekoga zagradila. i pitali su mi 300,00 kn kazne. narafski, već san platila trošak pauka koji nije ništa manje, vengo više, e, više.
a to parkiralište svitu moj je ono kod skule manuš, uza vukovarsku ulicu. nije označeno. kad san ja stigla, mista je bilo. ko kaže da neko nije zagradija mene? i ko kaže da je uopće iko ikoga zagradija?!
piše uputa o pravnom liku: moš se žalit.
i žalin se.
prođe vrime.
eto pošćjera jopet. zovu me na prekršajni sud u trogir (da, ši, sad su sud za split pribacili u trogir) i sad san već okrivljenik.
en ti pasa. i maške. i jude, zviri i beštimje.
u leteru su notali da će me ako ne dođen, privest.
i pođen ja u trogir. tantobuson. jerbo, kakve san sriće, ako arivan tonobilon, a zna se da na tu uru moran bit tot, kapac su mi i jopet dignit paukon tonobil.
za poč i vratit se izbrojin oko 40 kn.
uđen u sudnicu. puten san se nadala da će bar šjor sudac bit zgodan i pametan, kad ono niki ružni, brez kose, pitaj boga koliko godin, dere se, za pripast se. uajme.
ti put san mu probala objasnit da je tonobil bija na parkiralištu, a ne na pješačkom prijelazu i da nisan nikoga zagradila.
ma ke, govorija, ne govorija, ka da zidu objašnjavaš. lakše mi je svaki dan učit linu dicu vengo ča mi je bilo komunicirat s tin šjoron.
sve šta mi je jema reč je da jeman ja pinezi jerbo da svi privatnici jemaju (joj šjor sudac iz vaših justiju u božje uši) i da ča ja tot sad govorin da nisan kriva kad jesan i da ću barenko nešto u ti proračun dat. zapravo ti lik ni nije niki sudac, vengo sudski savitnik, a zove se bareta.
poslin san protegnila noge po trogiru, ono da dođen sebi i nazad u split.
prođe vrime.
eto jopet pošćjera. jopet nosi leteru. jopet moran u trogir. 
aj, mislin se ja sad će mi valjda pokazat litrat (sliku) da vidin ča san to bidna skrivila.
je, roge ćaćine.
sad je stiga svidok kontra mene.
policijot u penžjunu koji je u penžjun otiša malo ranije, sa 50 godin, a radija je na pauk službi. taj je reka da se zove jakus, da se ničega konkretno apropo moga tonobila ne sića, da bi pauk odija po gradu, skuplja tonobile, prije tega ih slika, slika se navodno šalje na pujanke di je taj šjor policijot sidija dok je radija i onda bi on iz slike reka diži oli ne diži. šjor suca, odnosno, pardon sudskog svitnika je svitova da me oslobodi, a sudac, ups, sudski savitnik ga je dobro ofrega kad je to reka. jerbo, on me je optužija i kako me sad on ka ista peršona more oslobađat? on, sudac, pardon, sudski savitnik bareta u toj sudnici je bog i batina i jedini on je taj koji more nekoga oslobađat, je li nan svima kjaro, a?!
policijot u penžjunu je onda mudro pridložija da se od policijota koji još rade traži litrat oli slika.
onda smo išli ča. sudac, ups, sudski savitnik je iskesija zube i reka da će on tu sliku tražit od policijota koji još rade. poza tega ćemo vidit.
onda smo se potpisali. policijot u penžjunu je bacija autogram na rubriku okrivljenik, a meni ostavija misto na rigu di piše svjedok. 
onda san ga pitala da ča mu je. 
onda je reka da je zbunjen i konfuzan, a ja san mudro zaključila da ako mu nije kjaro zaradi čega je tot doša da je onda i bolje da je iša u prijevremeni penžjun. 
onda smo potpisali novi zapisnik. 
i tot je bilo finito, višje nisan vidila suca, ups, sudskog savitnika baretu.
a reka je kazat sliku. 
još jednom:
i jesmo li vidili išta? jok, nismo. niko mi nije pokaza sliku!

samo je jopet ariva pošćjer i donija leteru u kojoj piše da san kriva i pitaju mi 300,00 kn za kaznu i još 300 kn za sudske troškove oli ukupno 600 kn, 600 mu kolpi palo.
to me toka platit, a niman se prav žalit. 

aj da van još špijan i da je sudac, uajme ne sudac, vengo sudski savitnik bareta napisa niki broj tonobila koji sliči na moj broj, ali nije isti. i da mi je i drugo vižitavanje trogira izvuklo za tantobus oko 40 kn. i da su policijotu u penžjunu rekli da će mu država platit dolazak i odlazak, a on u ti momenat nije reka da se ne ćuti svidokon i da pineze neće vazest.

danas je 22.06. 

još 8 dan do ulaska u eu i finit će kurbin pir. jerbo, ako ovo učinu hansu, johnu oli kojem ča se zove jacques, neće in proč lišo. 

nisan jedina kojoj se ovo dogodilo, barenko 10 svita mi je ispripovidilo istu štoriju.