e jesan pegula... ma ne to je srića haha :)

e...

kako smo ono finili jučer, a? ča smo rekli, a? u krdu je teplo, ali i smrdi brate, e...
a ja ne volin ni krdo ni smrad. volin kad mi lipo vonje.

danas san išla kupit šampon,
pituru za kosu (to mi triba znate jerbo kad ne voliš smrad krda, onda te toka posidit mlad),
pinu  za tuširanje u dma.
i ja sve lipo u košaricu i na blagajnicu. 
blagajnica mi kaže:
- imate dove pinu na akciji, a u paketu gre i spužvica za tuširanje.
- je li, a? baš lipo, uzet ću onda tu, drugu vraćan.
- koje ćete kolure spužvicu, morete birat?
- super. crvenu ako more, to je kolura jubavi i strasti, a ako jemate u paketu i još kojega zgodnoga da mi ton spužvicon prođe leđa, bilo bi fenomenalno.

puca blagajnica o' smija. lipo mi je vidit da san barenko nekoga nasmijala u ova gruba vrimena.
odlučin joj ispripovidit još nešto. da malo vidi kakav je život, e...
sad ću i vama. da vidite i vi ča je život,e...

znači, gre ovako. banke su me izmrcvarile i ka ča već znate cilo vrime san govorila da ću poč na drugu. i jesan. već niko vrime jeman račun oli konto kod druge banke i zasad gre solidno. sve ča mi u onih prije nije radilo oli nije funkcioniralo, ovod radi.

eto vidite, ča bi gucala svinjarije, more se i muža prominit ako ne valja, pa ča ne bi i banku.

nadan se da će ova ostat kako triba i ako bude ostala i ja ću tu onda ostat.

i baš ja mojoj materi govorin kako možda nije ni svako zlo za zlo, da mi je sad dobra i normalna banka i da se nadan da će takva i ostat i da sad neću bit skromna vengo da ću reč aj možda mi se posrići pa da baš tu u tu banku oli o' isprid banke upoznan i kojega normalnoga, dobroga, vridnoga, zgodnoga čovika...

ja jučer poza plivanja nosin pineze na banku kad isprid banke muško.

koji, a?
ma gad zvan bivši. eto na, stiga mi je zgodni, mislin se ja, e... normalan, dobar i vridan nije - zato i je bivši. to je oni isti ča u nedilju najranije nije jema di poč kupit kruva vengo di ja stojin, e... taj, e. jesan van rekla da će doč opet, a? ne moš ga se rišit, e. eto ča ti je srića.

smije mi se mater na tu sriću već dva dana, smije se sad i blagajnica u dma, smijen se i ja, smijite se svi.

gren na more, možda mi se tu posrići.
jerbo nikad ne znaš di te srića čeka, e...

a za tuširanje jeman dove i spužvicu crvene kolure :)