čari tikvica

e...

 

najgore je sve gledat u nikin strogin okvirima. nekad je potribno malo drugčije. nekad je potribno prič kvadar.  izač iz škatule, kalupa, šprance. ne mora uvik sve bit isto. cviće može rest u raznin pitarima, kockastin, kvadrastin, kuglastin, gredicama, čizmama, kašetama. i svako more bit lipo. nikad ne znaš di te srića čeka, a kad sriću nađeš, sa srićon tribaš sritan bit.

 

 

nedavno san na tv gledala izvrsne emisije Nigela Slatera , čovika ča vrlo često prelazi okvire i to u najvažnijoj stvari na svitu, a to je narafski kužina. oduševija me. sa koliko ideji i strasti čovik kuva i baš sve mi je lipo vonjalo čak i kroza tv. odma bi čovik izija iako nešto pari i neobično, drugačije, novo.

vidi i link: https://www.facebook.com/pages/Nigel-Slater/170471764730

 

tikvice se ka šta cili svit zna moredu učinit na mali milijun načina. u mene doma najviše smo ih činili lešo i šufigane. i narafski da san ih tako volila najviše.

 

e... sve dok nisan vidila nigelove emisije, a (mora se priznat) zgodni nigel kaže: ispeci ih. ši, š njima na kolutiće i ispeci ih ka šta pečeš kumplire, u tavi oli pršuli.

 

ako ih učiniš same tako, jemaš fantaziju od okusa. probala - živa istina!

 

e.... ma jema i dalje. možeš dodat i kumplire na fete, pa jemaš još jedan okus. i još jedno lipo jelo. probala - živa istina!

 

e... ma jema i dalje. možeš dodat i pome na fete, paprike, karotu itd. učini veselje od onega šta jemaš. fantazija, mmmmm, odlično je.

 

 

narafski da tot nisan stala. u jedne foje viđena je ideja da se o' tikvica more učinit i rižot, pa san i u njemu guštala. navodno jema još i jedna finta kako od njih učinit pire, a čitala san da moredu proč i pohane, tribalo bi i to isprobat.

 

od njih smo učinili i šug ka ča se čini i od mesa i polili manistru. i to je bilo za prste polizat. asti sto, još malo i pribacit ću se na verduru tuto-kompleto. jerbo, samo se o' tikvica možeš naist ka car.

 

ako jema još koja ideja, notajte komodno. ne mora sve uvik bit isto, ukalupljeno, dosadno.  

----------------------

 

Borislava Borka Brncic- Tišma pohane su odlične,a ja često pravim pitu od gotovih kora s ribamim tikvicama s dodatkom jaja i soli,a još je bolje kad se doda svježeg sira ...ja tako najčešće pravim..

 

Selma Poparić malo ih pofrigat, kad omekšaju zalit vrhnjen i posut bosiljkon ! :)