e... uvik triba nekoga oli nešto čekat, a svaki grad jema svoja mista za čekanje. ovi litrat gori je slikan vizavi prime prije puno godin i nisan ga slikala ja vengo san ga peškala na internetu, ali odma san bila sritna ka san ga sinjala. zaradi čega, a? prima. budi sićanja. koliko čekanja tot, a?! čekaš tantobus. ja ga doduše nikad ne čekan jerbo uvik gren na noge, a kad baš moran sidnen u tonobil. dobro, budimo onda točniji: svit čeka tot tantobus. tot ste se barenko nekad s nekin dogovorili za se nač, ma ko to bija, mater, kumpanjo, momak svejedno. a filmovi, a? poč u centrala, pa ako je dobar film čekat i po uru dvi za karte. narafski, neš uvik sve ni dočekat, ali ako te neko zafrkne i ne dođe, komodno uđeš u tantobus oli produžiš na noge, niko neće ni sinjat da si nekoga čeka jerbo tot stvarno prođe puno svita.
drugo kultno misto za čekanje u splitu je kod svetoga frane, a to van je narafski na vrj rive. hm? hm? jeman li prav? di je vrj rive to se baš pouzdano i ne zna jerbo se mi ovod u splitu nismo još dogovorili sami sa sebon, a ni sa drugima di nan je vrj rive. je li to kod svetoga frane oli put pazara, a?! zaradi tega se nikad nemojte poč dogovarat s nikin s ričima nač ćemo se na vrj rive jerbo vas moredu krivo skontat i morete onda čekat ka mona kod svetoga frane dok drugi falije, pa pođe put pazara. triba lipo reč kod svetoga frane i onda je kjaro, e... evo još jedan litrat iz osandesetih, bokunić rive kraj svetoga frane. vidi konfužjuna, a? jo ča bi tot bilo svita, nisi se ni triba s nikin dogovarat, jednostavno bi izlipija vanka i ča kod svetoga frane ča deset metri dalje na matejušku, dočekalo bi te svita i svita i dok bi svakome rekla evala, već bi došlo vrime za poč doma.
danas teško moš trefit dvi poznate čunke kad prođeš priko grada. pustinja. ka da je zavladala kuga i kolera. i šta moš, a? ništa, čekat da prođu takva vrimena i dođu bolja. e bravo, moš se i s nostalgijon sitit kako je bilo nekad, puštit suzu dvi i zapravo bit sritan ča smo resli u neko bolje, humanije vrime kad su čoviku nešto značila i druženja, kumpanji, pisma, batude... ekola, gren ča, počekajte još malo i kad opet buden o' volje notat ću još štagod, rič dvi kako je bilo nekad i upratit ono ča je sad. zdravi i veseli bili!
Nema komentara:
Objavi komentar