*****

e... gledala san danas dicu ča treniraju plivanje u jadrana.

 

i ja san trenirala plivanje, samo u mornara.

 

jo, kako je to dobar sport.

 

plivan ja i danas, onako, za svoj gušt i kad se dobro isplivan odma san bolje volje.

 

plivanje, jedrenje, izviđači - za dicu najbolje. steče se ekipa, zdravo tilo, zdrav duh.

 

dici svako jutro trener zada trčat po plaži i plivat. jema i prav, more je još teplo, u bazenima mogu bit i zimi.

 

kako su samo sritni, cika vika, tutanj, sve pršti o' veselja i života. plivaju od jadrana do kašteleta i nazad. jema mriža, pa uz nju. nima bolje.

 

puten su otkrili siku. ta je na samon zvončacu, tamo di su prve skale za u more, pa uz mrižu malo livo. gospe moja, koje otkriće, ka da su otkrili otok s blagon. svi se penju na siku, guštaju, super malo odmorište prije vengo se nastavi plivat.

 

i kad pogledaš tako, vidiš kako su dica pametna.

sunce, more, trening,  ekipa, novootkrivena sika, život je lip. :)

 

dicu veseli sika, odraslima ni cili otok nije dosta.

dica znaju skakat s (često tuđe) prove u more i bit najbogatiji na svitu, odrasle ne veseli ni jahta ča piza milijune eura.

 

zato se ja ne sekiran kad mi neko reče da san ditinjasta. meni je i dandanas drago veselo skočit u more, plivat, guštat. baš takav mi je bija današnji dan. super. narafski da san na ovo lipoga sunca i onu ponistru o' nikidan piturala, malo jučer, malo danas, prvu rukicu jeman, ovih dana ću učinit i drugu.

 

veselin se i sutrašnjen lipon danu, a i lipon obidu koji me čeka. ništa mi ovi dan neće pokvarit, a ni oni sutra.