e... sfinga, naša draga spli'ska maška se vratila na svoje misto. bilo je i vrime. mistika i jopet iz nje zrači ka uostalom i iz svake maške i zato maška i je maška. učinila san ova dva litrata ovih dan, morete ih uvećat klikom.
kurjoži grgur gleda kroza vrata o' zlata koliko će mu još furešti doč škakljat palac, a meni se ovi put ne da čekat filu za poželit želju. neće želja uteč, moren ja i drugi put kad konfužjun bude manji. a šta želin, a? zdravlja i mira,e... kad je toga moren i radit i zaradit, pa će bit i pinezi. kad je zdravlja moren i štagod svojim rukama učinit, danas je na redu pituravanje vrata. (hehe pripremila san sve jučer, dvoja vrata kitana, prođena karton deveron, jeman dulux pituru za koju mi ne triba terpentin ako kapne jerbo se čisti vodon, super)
a muški, a? - sad će neko reč, e... a ča se njih tiče, njima želin najviše zdravlja, više vengo sebi, naročito onega zdravlja ča ga je potribno jemat u ćivericu.
jerbo, najveći problem svake vridne, radišne, poštene i moralne žene je barenko jedan muški linguz i nesrića, a ako je bolje sriće, može ih u njenom životu bit i više, recimo: muž, vinčani oli nevinčani, svejedno, momak, jubavnik (ovi se baš neće pojavit kod moralne, ali dikad pate i one manje moralne), šef, ćaća, barba, susid i sl.
narafski da jema i muških kojima je problem kakva linguza kojoj je teško i robu oprat, a kamoli sredit kuću oli oprat tonobil. takve muške toka stavit traveršu i radit štagod, a ako neće tako, mogu i šporke bičve vadit iz šporke robe, pa gledat koje najmanje vonju da jemaju štagod obuč za sutradan. obično takve muške ni najmanje ne žalin jerbo život mi je pokaza da su takvi muški obično jemali kraj sebe i kakvu šesnu ženskicu, ali im je linguza bila ludilo, pa neka sad lipo guštaju u ludilu. je li tako, a? jerbo jema ona jedna stara mudrost, izbirač nađe otirač, štraca škovacu...
vengo kad san već kod bičava, ja svoje još uvik ne nosin jerbo je još uvik prikovišje vruće. znan da ste kurjoži, pa ću van špijat da su mi u armerunu, uredno složene, svaka sa svojon paricon, e... robu škuru san oprala prikjučer, a bilu jučer. danas ću šumprešat ono ča triba šumprešat. narafski, a neću valjda tražit sluškinju, e... vengo kako je puno vruće, ja se dižen tutokompleto rano. i nediljom. u 5:35. jutros san na ove sike od ježinca bila prije osan uri, isplivala se dobro i u 9 i nešto mi je tonobil već bija na parkiralištu kraj kuće. narafski, masu puti oden i na noge, hodanje je zdravo. uprite u litrat i jemat ćete šta vidit. ča je ariva kruzer još moren razumit, ali ovi katamaran i ova jahta, hm? je li ovo opet neki mukte sidre di ih je volja, a?
gren pomalo ča, zdravi i veseli bili... čekaju me me obaveze, ovo mi je jedna od ritkih neradnih nedilja, pa je moran dobro iskoristit za rad oko kuće...
Nema komentara:
Objavi komentar