*****

e... na merjanu san bila skoro svaki dan, po suncu i kiši, po buri i jugu. kako se poza osan godina privatnoga sektora više ne bojin ničega (tako je to, otupi i ogugla čovik na sve), i jopet ću poč na merjan. no, fakat je da po merjanu šeta monstruozni ubojica koji je ubija bidnu meksikanku. split je odavno presta bit pačifiko grad i slobodarski grad, ma koliko mi mučali o temu. ovo je grad u kojemu splićani misle je li im ostalo dva piruna brudeta od obida u tečicu za večeru oli koliko je osta ajduk, a to oče reč da ih tutokompleto nije briga za ništa. ništa konkretno, ništa di triba uključit možđane. indiferentni toliko da pare impotentni i to ne doli, vengo u ćiverici, e... ženskima je pak važnije jesu li suside kupile skuplje postole od njih i je li tamo nika ane oli mare s posla našla novoga tipa, vengo išta drugo. indiferentne toliko da također pare umno ograničenih sposobnosti. narafski, postoji i onaj kreativni i vridni dil splita koji u dubini duše pati ča je gradski grad takav da je pustija da onaj dil grada ča ga čine seljačine (molin razlikovati pojam seljačine od seljaka), puvanderi i tupine čak javno priti da će gučke vadit prstiman, a takvi su se nažalost i vlasti dočepali. osin gučaka, i opijanje tuđon krvi se spominje svaki dan, šeto neto, a ako neka obrijana glava koja gleda puno tuplje od najtuplje beštije, pa je ne moš zvat beštijom jerbo je to puno lipa rič i bilo bi grijota, vengo stvorom, zaključi da si joj nešto kriv, čakija se odma vadi. čakija, sikira, rašpe, bombe, rivolveri, šmajseri ispod sica. itd. split definitivno višje nije pačifiko. stigoše divlji i istjeraše pitome, a pitomi bijahu prikovišje nezainteresirani za išta ča se oko njih događa da je sad tako kako je. split je presta bit slobodarski. ši, upravo tako. split koji je istira sve dušmanine i uvik bija slobodarski je sramotno nacrtan u odvratne svastike i odvratno u. ne virujete? nezainteresirano niste gledali, e, one se nalaze na svakoj fasadi, po javnim površinama, zidićima, svugdi. i malo koga je briga. mene je briga, evo stalo govorin pricidnikovici kućnog savita da ono ča su ljudi bez puno pameti namrčili na našu zgradu nekako maknemo s naše zgrade. da, jerbo ja se ćutin loše kad vidin te simbole i vriđaju me. vriđaju oni i furešte i sigurno bi ih više arivalo u split da je split i dalje slobodarski, a ne nacrtan u svastike ka nacistička njemačka. kuka se mižerija, a najveća je u ćiverici oli glavi. kad su furešti stigli, odma ih je pribilo i nabilo na bače, zaklalo na merjanu. policijoti gube vrime na brata, beskućnike, a i maloj dici je kjaro da je barenko 70% vjerojatno da je ubojica neko ko tu na merjanu radi i/ili tu je dobro potkovan, jema tonobil, lopatu i selojtep u portapaku i ono ča me muka promislit, ali pari mi da postoji mogućnost da je ubija i još koju peršonu prije bidne meksikanke i da će ubit još. ko zna oče li ga uvatit? jerbo, ni dandanas se koliko ja znan ne zna ko je zakla marijanu jerković na mažuranićevo šetalište, onu ča je radila u agenciju za nekretnine, e, a ne zna se ni ko je ubija popa za kojega se pričalo da je bija prikovišje razvratan, ali ubojstvo je narafski prestrašan čin ma o kome se radilo. itd. nosija je neki lik i neke pineze u kuferu tu blizu u kvartu, njega je koknilo na skalama portuna, ne znan je li se ikad doznalo ko je to učinija. zaklalo je i čovika u po bila dana na pazaru, to se znalo ko je napravija jerbo su svi vidili, a eto, dogodilo se i ubojstvo na merjanu. i ovo nije prvo, koliko se sičan, moj kolega iz srednje skule i sa studija je šeta s pason po merjanu i naša leš obišen na stablo i kad je zva policijote, onda su mu još zapivali da je nafrka ako ih laže. čovik nije laga, a oni se mislili oče li doč na merjan. na kraju je i to bija jedan naslov u foje oliti novine koji je iša ovako nekako: študent fesba naša leš na merjanu... split nije pačifiko grad, odavno je presta bit i slobodarski, a svit uz kafu reče bože strašno i poslin na tim fojima očisti ribu. i zaboravi.

bičiklete će i sutra jurit kroz marmontovu iako je pješačka zona. prosjaci će i dalje prosit po ulicama grada splita. vozači se vozit ka šimije, a babe će zatvarat joči i itat se na cestu tamo di nema pješačkog, pa šta bude. policija je komičnija od narodne milicije, svjetina bira poteštata koji gučke vadi prstiman, svastike su na svakom kantunu, ubojstva se događaju i riješe ako se ubojica sam javi na prvu oli drugu oli ako ga je vidilo sto svita, a nama poreznim obveznicima ostaje ona čuvaj se, pa će te i dragi bog čuvat. ja ne mislin rebambit, pa ću poč i dalje na merjan kad me bude bila volja jerbo ležanje na kauču je nezdravo, ali je manje pogubno za život, istina, no možemo i moramo obranit marjan. narafski s oprezom, ne triba sam poč na puteljke, ali nećemo valjda pusti da merjan bude misto zone užasa. uostalon, ka ča san napisala, pobilo je pusti svit i u samom centru gradu. očemo li više ne izač iz kuće? ubojice će šetat, a policijote na ulicama opče neš vidit, ma zamisli?! policijo, šetaj malo po gradu i kontroliraj malo promet. e da i kad neko ma ko (jerbo svi bi prid zakonom tribali bit jednaki) zapriti vađenjem gučaka, pozovi ga na obavisni razgovor. kad se nasilje bude tretiralo po zakonu, neće više bit toliko in. cool. i slično. dvadeset godin se veliča i postalo je vrednota, recimo ljudi, sasvin glasno, to je sramota!