e... i tako me jutros tokalo poč u banovinu. najranije. da dođen u 9 uri kad jemaju rad sa strankama. tako im piše u radno vrime na vratima. narafski prave si sriće ako uspiješ nač onoga koga tražiš, a ja san se danas ipak nadala da će ogorje u radno vrime bit na radnom mistu. koje sad ogorje, a? a ono u koje se split pritvorija jerbo ka ča znate naš lipi, šesni i nadasve pametni poteštat žeki je iz tega sela (nemojte sad jopet pitat kojega, pa to je narafski najvažnije selo na svitu jerbo baš to je centar svita) i narafski da je tot zaposlija cilo selo i svu svojtu i svojtu svojte. otišla san brez tonobila jerbo se o' tega silnoga svita ča se zaposlija u banovinu nimaš na zvončac kroza jutro di parkirat, a da vam pravo rečen tila san i malo protegnit noge i vidit je li jema na onoj nesritnjoj raskopanoj rivi barenko tri radnika. bilo ih je čak 3x3 oli devet. tako nekako :D eto stavljan znak za nasmijanu čunku, onu ča se kesi o' uva do uva jerbo zapravo je sve za plakanje, ali rađe ću se kesit vengo plakat.
i još nešto. kad mrvu uraniš, onda znaš da će i još svita mrvu uranit i da će čekajući svak sa svakin počet ćakulat i da ćeš čut pravih batudi i da će svi lupeži i kurbini sinovi diljen lipe naše, a pogotovo ovi ča su u split bit ogađeni tutokompleto. brez pardona.
i tako san ja lipo, ka boris dvornik sa devizon karat mi se triba, karat se oču, uputila na noge u banovinu. vidila san 3x3 radnika i narafski da se do 9 uri o' isprid vrata skupilo fotanoga svita. i narafski da su rekli sve ka ča je, narod opče nije blesav, sve vidi, sve čuje, sve razumi. pitan se samo kako se onda dogodi da izabre glupu vlast?! hm? more bit da su to sve mrci glasali. oli oni ča ih nikad nije ni bilo. jerbo, ne virujen da narod koji je ipak pametan bira budalasto. ipak je jutros sto svita isprid banovine bilo fotano i svi su vikali doli lupeži. narafski, najinteresantnije mi je bilo kad smo se počeli pitat kad će željko kerum, saborski zastupnik, u sabor javit ča mu žena jema. jerbo, još to učinija nije.
kad smo počeli o temu govorit, odma su se otvorila vrata o' banovine. baš kad je bilo najinteresantnije. ja sa se nadala da ćemo svi zajedno uspit skontat koju bi on ženu i imovinu tamo u oti sabor triba prijavit. a ništa, bit ću valjda bolje sriće drugi put, možda ćemo doznat odgovor na to intrigantno pitanje. očemo. jednom.
ajmo ča dalje... kad uđeš unutra, najprvo tribaš dat osobnu redaru i on te upiše u libar vižitara. e sad, ovi redar ti mene pošalje na drugu bandu, di se plaćaju nike uplatnice. tamo me i jopet pošalje redaru. e onda san mu lipo i sasvin jasno rekla da ja triban poč vižitat službenike banovine i da me više ne zafrkaje, vengo da me upiše u ti libar vižita. u to me zovoni mobitel. e sad, ja jeman pametno čudo, odma mi pripozna broj i na ekranu piše grad split. super, odlično, promislin se jerbo mogla mi se pojavit i rič ogorje, a fala bogu nije.
ajmo ča dalje. zove me ljiljana vučetić. rekla san joj da ću je doč vižitat čin me redar upiše u libar vižita i da naprosto čeznen da joj vidin čunku jerbo me živo zanima koja to peršona jema obraza poč na takav način krest mojih 200, 00 kn.
e sad mi redar nije virova da gren u nje. a ja mu lipo govorin da me upravo zvala na telefon. onda je on zva nju. i ona mu je rekla da me čeka.
tako san lipo imala doček skoro sa fanfarama, a nekako san duboko uvjerena da tega baš i ne bi bilo da jučer nisan notala na internet ča se događa i poslala mailon link na grad split.
onda smo lipo sili i vidili da san za 2009. i 2010. rješenje dobila i porez platila. za 2011. su rješenje našli u svome škafetinu, a za 2012. san rješenje ka ča znate dobila jučer.
toj šjori vučetić san lipo i sasvin jasno rekla da nikakvih 200, 00 kn na ime kamata neće dobit, da me krest neće i da me neće pravit majmunon oli ka ča bi mi splićani rekli šimijon. tužna srca je prihvatila činjenično stanje, a bahatost joj se smanjivala ča me je više gledala i slušala.
navodno im je pošta moje rješenje za 2011. vratila. e sad ako je tako, odakle im prav da mi šalju ikakve opomene, a? znate ča san joj rekla apropo sve tega. evo ovo san joj rekla:
1) nisan se nigdi sakrila i niman selo na koje bi mogla poč jerbo mi se u split rodila i prababa. zapravo u split mi se rodilo nikoliko prababa. :D
2) uvik san na istoj adresi, pošćjer dobro zna kako izgledan i pozdravlja me i kad nije u službi, ćakulan s njin na ulici. prema tome šta ja znan kako van je pošta rješenje vratila, tražite sami ča ste krivo popunili, ispunili i sl., a ja ničiji nerad plaćat neću! isto ka če me pošćjer redovito vidi, vidi me redovito i cili split čiji dobar dil stanovnika poznajen.
bilo je tu uza nju još nikoliko baba i jedna od njih mi je danas konačno uručila rješenje za 2011. e sad san im malo zbrojila ča za te pineze (a 2000 kn poštenome čoviku nije malo) jeman. pričala san joj o splitu punom šporkice, škovaca i smrada. o govnima na svakom kantunu. o oglasima za rad na crno na svakon semaforu, stupu, kanti o' škovaca, portunu. o snigu i ledu. o klizalištu u marmontovoj i rivi. o slomivenima. o šteti koju mi je grad split pričinija ne očistiviši snig. itd. pitala sam ih je li ih sramota primit plaću za veljaču u kojoj nisu ni išli na posal?! pitala sam ih je li ih sramota da 7 miseci budu škovace o' isprid galerije meštrović. http://www.xvii-online.org/2010/09/festa-od-nereda-sporkice-i-skovaca.html
virovali oli ne, ovo na linku je tekst od 20.09.2010. i sve ove škovace su još uvik na temu mistu jedino su posrane pelene o' isprid galerije meštrović makli i to 7 miseci nakon objave teksta; osobno san gospju anđu (anđelku visković) 4 puta pitala kad će se to očistit i nije mi odgovorila ništa, a oni prajac o' zaninovića (glavni komunalac) ča je sa menon odija u elektrotekničku skulu u razred mi je reka da se to očistilo čin je on dobija informaciju tj. moj maila o temu. bravo pave, i u kocu (svinjcu) je urednije.
i tako, vrime je prolazilo, a gospoja ljiljana vučetić je bila sve manja i manja. više je nije bilo čut. morala mi se ispričat i reč da nikakvih dodatnih 200,00 kn ne triban dat.
poza tega san išla ča. jerbo, neko u ovemu gradu triba i radit za napunit proračun.
žekija fala bogu nisan trefila.
Nema komentara:
Objavi komentar