a kad se dobro ne gleda i 1 postane jednako 2...

klik za veće... :D

ajde boga ti linoga...

e... gledan ja tako nikidan malo svit oko sebe. gledan i šta ću, kako gledan, tako i vidin. najgore je kad čovik jema zdrave joči, a š njima ne vidi. isto vridi i za ušesa. njih nam je bog da za slušanje isto ka ča nam je i joči da za gledanje, e...

isprid mene gre čovik, gura malo dite u kolica, drugo, malo veće vodi za ruku. potiže i borše, ča one ča ih je nekako stiva u ruku, ča one ča ih je obisija na kolica. prvo kraj njega, a onda poslin pomalo sve višje i višje iza njega gre žemsko.

ne znan je li mu žena jerbo danas je ka ča znate moderno ka i naš poteštat činit dicu i život van braka, ali eto pretpostavit ću da mu je žena. vjenčana, nevjenčana, svejedno.

jema dugu kosu. učinjenu u pramenove. e a ča se čudite, a? oli to nije moderno, ti pramenovi, e... duga joj je ta kosa, sve do gujice. jema i postole na tak od pustih cm. ja u njima ne bi mogla dva metra učinit, ali eto, moderno je, pa ženske nose.

a nosi li šta? ništa. ništa? ma ništa osin kose i taka. čak je i svoj boršin uza sve borše utrpala njemu.

nosi sebe, kosu, take i dobro, gola nije, jema na njoj i kakava moderna štračica ala utegnute gače i to je to.

puše. jedva ide.

na kraju je čuješ: "ja ne mogu višje."

narafski, čuješ i njega: "a očeš li da te na krkeča nosin, a? ajde, boga ti linoga".

a je li mi ga bidnoga tako naprćenoga ka tovara bilo žaj? ma ke, e... odavno ne žalin likove kad ih vidin tako, s jednon linguzon kraj sebe i da ih sve toka radit. zašto bi mi ih bilo žaj, a? zašto nisu gledali, a? je li im bog da joči? njima se gleda, e...

vridne, radišne, poštene cure im nisu bile nešto, a ako se koja takva i našla blizu njih, brzo su je potirali i izabrali "lipoticu", odabranicu srca svoga, onu ća je jemala dugeee nokte, velike take i ča je znala dobro floćavat.

e pa neka sad takvi rade za kapeline i take, neka zaradi linguze potižu i dicu i sve borše, čak i njezin boršin, neka im. jedan normalan, ravnopravan odnos nisu ni zaslužili. da, ši, jušto tako.

isto je grubo vidit i da je žemsko žrtva, ali višje ni njih ne žalin. bog je i njima da joči. jočima se gleda. gleda, narafski. a ko gleda, i vidit  će ono ča vridi.

*****

eto, ovi parkovi i nasadi su ipak stigli u nekom razumnom roku i ispilali stablo koje se srušilo. nije ni na policijote tribalo čekat do pemzije. jučer san pak zvala policijote zaradi jednega slučaja nasilja na ulici kojega san vidila; virovali oli ne, došli su kroz manje od minut. minja li se šta ka boljem? mislim da je, ali tribat će puno vrimena dok se ova zemlja opet digne na noge. jerbo, dugo je svak činija šta ga je volja i niko nije odgovara za svoje postupke.

posljedice bure

Bura čupa stabla, 27.02.2012. Split, Tolstojeva
Koliko km na uru je ovi put učinila, a?

malo prije 8, narafski, zvala san parkove i nasade... sad triba čekat pile.

žunta, malo poza 8, ima par minuti da su pile stigle...

žunta, malo prije 9, evo i policijoti jerbo ima i štete...

par besida na kraju šetimane

e... tokalo me ovi vikend obavit puno posla. najprvo san u petak prije prvih pivaca utrnila žveljarnin koji da van pravo rečen i višje nije žveljarin, vengo mobitel, ali radi isto ča je činija žveljarin, a to oče reč: drnda i budi dok ne probudi.

di se odilo, a? daleko, na drugi kraj splita, a meni ditetu s manuša to pari da san išla na drugi kraj svita. taj dil splita je moj pokojni dida zva trščenica, ali ako van rečen da san odila na trščenicu, ne virujen baš da će puno svita znat di je to, e... očemo li otkrit i tu tajnu, a? di je trščenica, a? e to van je na lovrinac, lipi moji.

ako me tokalo poč na lovrinac, kako onda sad ovo notajen, a? nažalost malobrojnih neprijatelja oli dušmanina i radost velikog broja kumpanji oli prijatelja, živa san. nisan još partila, ma ke, e... a oli tamo ne more poč i živ čovik kojin poslon, a? recimo ka ča san ja odvezla tonobil na servis, e... (u gašperova koji je isto tot, e...) i dok dura servis odnit malo cvića mome pokojnome didi i pokojnoj babi od kojih san i naučila spli'ski govor.

ka se mrvu bolje promislin, naučila san ga o' dide jerbo moja pokojna baba, a ona je bila baš o' stare spli'ske fameje ivančić, i nije isprid mene forsirala tutokompleto stare spli'ske riči jerbo je virovala da dica upijaju ka i spužve i da ako naučin govorit postol, da ću i u skuli reč postol umisto cipela i da ću dobit asa u rvacki zaradi tega ča se u skuli triba govorit književno, a ne po spli'sku. virovala je i da ako rečen šuferin umisto žigica oli šibica, niko ni neće razumit ča govorin. dida me je naučija sve spli'ske riči koje znan, a on ih je čuja o' svoje matere. moj dida je bija rođen 1922. to da ga morete smistit u vrime jerbo jema i još starijih riči, ali ako ih on nije dupera, ne duperan ih ni ja; neka se o takvim ričima čita u kakav rječnik oli po starin kartolinama.

e bravo, ka smo već kod kartolini, evo sad san se sitila da bi bilo dobro ovod stivat jednu iz 1922. 

pogled s merjana, 1922. - klik za veće

ovo je za mlaje. da vide kako je bilo lipo prije višala. prije duševno bolesnih peršona ča su unakazile i split i rvacku.

didi san narafski ispripovidila kako je bilo na krnjevalu lita gospodnjega 2012.  i kako san izblesirala luku bebića. znan da mi je dida gušta samo tako kad san mu rekla ča je bilo. :p

ajmo ča dalje? kad san već na drugon kraju svita, tribalo je odit i u veliku butigu u kojoj je butiga do butige, a zove se city centar one. asti sto, kad tot dođen, triba mi nikoliko uri za obač svaki pod i uč u barenko svaku treću butigu. nisan vazela bogznašta jerbo mi je tonobil još u gašperova, jušto onoliko koliko san mogla teglit, e... uto me je zvalo da su finili s tonobilon i narafski, kad san se vratila na manuš, bila san sritna ča san našla misto za tonobil samo 10 minuti hoda o' kuće. poslin san ga selila bliže. eto ča ti je radni dan.

očemo li još jednu kartolinu, a? očemo. ajmo malo predahnit prije vengo opišen subotu i nedilju. ono ča bi rekli fermat i uvatit arije.

riva 1935. - klik za veće

narafski, najbolja moguća vijest je da bi se ružna višala konačno mogla maknit s rive. izgleda da bi se to moglo dogodit. ja se nadan da oče jerbo postavljanje višala na rivu je kulturni zločin i da se mene pita svi oni koji su u temu učestvovali bi tribali bit kažnjeni. narafski, proč će ti likovi lišo, a mi ćemo bit sritni ako se višala ikad rišimo. živi bili, pa vidili. ako nova vlast/ministarstvo, to uspije, kod mene će odma dobit jedan punat i za iduće izbore. ako ukinu privilegije uhleb sektoru, dajen dva punta, a ako brez privilegija ostane mesić i crikva, dajen tri punta. da će teč med i mliko, to je narafski sajns fikšn, hdz je i prikovišje ukakija i tribat će godine rada i to teškoga rada, težega od radnih akcija koje je organizira drug tito, da se ova zemlja digne i jopet na noge.

vengo, kad san već kod mlika, gledan ovi demonštracijun mlikara na tv, gledan mliko koje se proliva i mislin se koja grijota, je li se to moglo dat sirotinji, a? i još se nešto mislin. svak jema prav na demonštracijun i bit nezadovoljan i fotan, ali jema li prav borbon za svoja prava drugima narušavat prava, a? pravo na slobodu kretnja je pravo nekoga drugoga čovika, čovika koji oče proč tim cestama. i još mi nešto nije kjaro. viče se, demonštrira se, a ča država jema s tržišnon cinon mlika, a? po toj cini ga prerađivači oče otkupit, višje ne daju i ča sad tu more premijer milanović, a? da van pravo rečen i ja bi rado svoj rad cinila višje. da bi mogla radit, morala san velike skule finit. moren i ja sad blokirat marmontovu i počet vikat da oču da mi višje plate za repeticije i da ako ne bude tako, oču hitnu smjenu ministra jovanovića a ni on ni ministarstvo prosvjete zapravo s mojin poduzećen nima ništa. a šta on jema s tin, a?  mi ni nismo pod njegovon ingerencijon. cina je tolika kolika je, a to je ono šta tržište more platit i to je to. kako će seljačaka buna finit, vidit ćemo. razumin da su mlikari fotani, ne razumin neke postupke koji se oko tega svega događaju.

ajde da van još špijan ča je bilo u subotu i nedilju. šta, a? rad. rad, e... subota i nedilja, pa rad, kako to, a? pitat će sad neki. rad je kod mene uvik, kad radin i zaradin, neće mi dat ni državni proračun, a nisan ni te sriće da dobijen na loto. doduše, ne igran igre na sriću, pa ti tiket o' lota, binga i raznoraznih pota ne bi imala ni mota ispunit.

a šta činin sa šoldima, a? ka i svi drugi, dobro mi dođu za kruv i mliko (ja mislin da je mliko skupo, moren li negdi demonstrirat ka potrošač, a?), čaj (dobro će doč i on kad ne bude mlika), ostalu spizu, režije, robu, troškove oko tonobila i sl. danas san platila nike režije, ali onu o' komunalija nisan još. protestiran, bunin se. ovi misec je pa snig. grad je bija neočišćen. pun sniga, leda i škovaca. je li čistoća mirita plaću za ovi misec, a? a poteštat, a? oče li ih bit sramota primit plaću poza onoliko slomivenih (ne smi se ni reč koliko, to je narafski, državna tajna) i poza štete koju su mi pričinili. i meni i ostalima koji od rada žive. ajme, fotana san, da mi je sad dovatit koga o' tih likova koji NISU radili svoj posal kad je pa snig, jo ča bi me čuja. komunalije ću platit zadnji dan ovega miseca. daklem, kerume čekaj još i budi sritan da ti to opče i platin, e...

gren malo laškat. promislit ću sad na dvi dobre riči. one su isto bile važne ovu šetimanu, e. koje, a? rižot i paradižot . zaradi čega, a? e to mi je lipi obid i lipa goluzarija za danas, skuvala moja mater, lipo i šesno, jerbo joj je danas rođendan. triba posebno napomenit da je rižot bija o' plodova mora, za prste polizat, a mojoj materi i ovin puten čestitan rođendan i želin još puno dobrih i veselih godina.

jerbo, ča je život, a? šaka suza, vrića smija, ča je život vengo fantažija...

:)

dobra, a? evo još jedna

i još ima tu:
http://www.facebook.com/#!/media/set/?set=a.313118645791.197041.304722745791&type=3

jedna oliverova snimka iz olimpije...

*****

lipi moji, svega se morete odreč, ali se nikad nemojte odreč našega dalmatinskoga dišpeta.

mrš u pajun

daklem, bile su ovo recesijske maškare na koje san potrošila točno 5,00 kn. za nos. ostalo sam imala. a sad kažem sebi mrš u pajun, sutra (tj. danas, prošlo je ponoći) radin cili dan. a štaš, tako je, ima nas jadnika i bijednika za koje nema iz crnog fonda, a ne bi mi ni tili tako :D

Split - Maškare -2012 (klik za veće)

Jubav je na selu - a ovo mora bit da se cilo selo Grab ukazalo u Splitu danas pozapodne. Evo jedva su mi u litrat stali.

Reprezentacija uvježbana na snigu i ledu.

Krnje za kojega je stvarno tribalo puno hrabrosti.

Rogonja uvik zadnji sazna da nosi velike rogove. Aj, valjda ovi rogonja nije, možda su mu samo rogi naresli jerbo ne vidin da ih je nekome peta.

Lipotice paunice, jedna je Luce, to san zapamtila...

Osin rogova moredu narest i uši i još svašta nešto, a morete vidit i cicu-macu.

Fameja Snjegović. Fali V. član, čer, pridružila se poslin. Kako se triba uzdat u nećake kad jema sniga, onda su tu i mali nećaci.

Je li ovo crvena opasnost, a?
A crna? Me ke, e...

Ako vam se crno crvena kombinacija čini predrastična, evo jedna crno - bila. Crni fond i nevista u bilom. Narafski da san za slikanje s neviston izabrala babu brkatu, te su najpoželjnije u lipoj našoj. Oli nisu? Šta ružnija i veća muškobanja, nekako mi se pari da je muškima draža. Do idućih maškara će valjda bit pametniji haha.

Ako ih neka budala ne oženi, narafski.

Sijamski blizanci? E to, a niste valjda mislili da je štagod drugo. Ma ke, e... Pa to bi bija incest, e... Oli nam nije dosta bigamije o tega šjora, a?

Kojega? Ma oli ga niste poznali?

Ovo je užgalo Krnju. Poslin onemižerjaste šetence koja je stvarno bila mižerjastija o' Krnje samoga. Ono, ka da je to sročila koalicija HDZ i ona stranka o' Keruma. Kako se ono zove, a? Seljačinarska? ma ne, Građanska, e....

A znate li šta zapravo ta kratica HDZ oče reč, a? Hajdemo Državu Zajebavat (1. nagrada, grupna)

Da vidimo ko je još zahebava po Splitu na pokladni utorak. Evo ovu dvojicu nije pozna ni kumpanjo iz razreda.Nije mi stvarno kjaro kako, ja bi kumpanje iz razreda poznala i da se u medvide obuku.

Sunce i Misec.

Je li ovo pašta-šuta, a?

Štikla (to van je tak, e). O' Seve, narafski. 1. misto - pojedinačna.

Potirajmo zle sile. Neka se čuje daleko.

E bravo, ovo san ja doma, prije vengo san se uputila u grad.  Vidila san Luku Bebića (pravoga pravcatoga) popodne Marmontovoj. Došla ja isprid njega, pitan ga: Barba Luka je li mi dobra maska, a? Priznaje on je da je. Onda san mu rekla da san je prijavila na natječaj za nagradu i kažen mu: Je li miritan nagradu? Oču li je dobit ako bude pošteno? Ako bude pošteno, bit će nagrada i to po nekoliko osnova - odgovori pucajući o' smija. Je li bilo nagrade? A ne, nije, ali je smija bilo na mašure.... :D :D :D A ovo šta san ovako zahebavala jednoga pravoga pravcatoga velikoga HDZovca, vridi višje od nagrada :D

Splićani su bili jako zainteresirani da dobiju štagod iz kufera crnog fonda, onega sa velikin noson i znakićima dolor-euro po čunki, ali nima. Njente. Sve se odavno razdililo i to pošteno razdililo.

Splićani su bili zainteresirani i za šetnju Marmontovom i Rivom, a znali su dobro da je tamo klizavo i opasno. E ko im je kriv ka su tamo išli naletili su na ove dvi maškare. Inače, ova zadnja slija nije moja, nju san sasvin pristojno otela sa fejs profila jednega cinjenoga spli'skog likara koji je jema pune ruke posla kad su se nikidan ne Splićani, vengo niki drugi ljudi po ledu lomili, pa ih je dotralno njemu na Firule. A k'liko ih je na kraju bilo, a? Ne mre, državna tajna, ima da odbiješ drugar. Finito. Do idućih maškara.

Narafski, zahebanciju ću temeljito provodit svaki dan. Ne odričen se ničega. Neću valjda plakat i kukat ča je crni fond probužan :D :D :D

maškare 2012, split maškare 2012, maškare u splitu 2012, krnjeval split, karneval split, maškare split, splitski karneval, splitske maškare

maškarane godine naše...

http://www.xvii-online.org/2011/02/maskarani-vremeplov-oli-ca-je-zivot.html -
PRIKLANJSKE I ONE PRI NJIH


http://www.xvii-online.org/2011/03/split-maskare-2011.html-
LANJSKE

ko se još sića lanjskog oli priklanjskog sniga, a? a maškare? e to pamtimo, o temu pričamo. kroza sve ove godine učinila san ludilo litrati oli slika (dostupno priko gornja dva linka), a probat ću i sutra peškat koju.

a šta ću bit? e to ću van pomalo otkrit, do sutra je tajna.

guštajte, život je maskenbal :D

hehe

partija je mosor :/

http://www.slobodnadalmacija.hr/Mozaik/tabid/80/articleType/ArticleView/articleId/164748/Default.aspx

kolega inđinjeru o' najjače struje na svitu, adio!
falit će nam svaka tvoja emisija, batuda, spli'ska rič. :/

tako dobra vijest :D

http://www.tportal.hr/biznis/gospodarstvo/177038/Vidosevic-reze-doprinose-i-clanarine.html

super!
više HGK neću plaćat 55 kn, vengo 50 kn misečno.
odlično. oduševljena san.
još da mi neko oče reč šta od njih iman jerbo
radin osmu godinu i još to nisan dokučila....

indigo sličica

indigo sličica by xvii

jubav si moja zauvik

eh... jubav je... jubav je kad ti je važna samo jedna jedina peršona...

i kad me slomi o' života brime, na usnama mojin bit će tvoje ime.
jubav si moja zauvik, za moju dušu i rana i lik.

u autobusu

tantobusi voze. to je veliki uspjeh. idemo navit malo prikladne pismice :D

izvještaj za jutros

stiglo je niko čudo, gusjenice i velika lopata sa zubima- kombinacija, čisti već nekoliko uri parkiralište isprid naše kuće.
to je parkiralište u tolstojevoj...

fejs komentari:

Zoran Sambol bobcat
Nada Magazin da, da sliči na bobija, tako nešto :)

bila san do bena jutros dat mačkama štagod izist. do bena se može i u take, tu je i poslin drugoga sniga odma čišćeno, ono, da se može do žekijeve birtije...

pozapodne radin, do nas se može i na noge i tonobilon jerbo smo sami sve očistili. :D

ka će više sunce? dosadile su zimske radosti i nevolje...

stigla je i mehanizacija, jupi :)

kamion + 2 ralice + rotaciona svitla maloprije u tolstojevoj. eto stigli su... kad se okrabija. bolje ikad, vengo nikad. a sad će valjda nač negdi di bi mogli čistit...

gospe moja počelo se pričat i o mrcima

eto na, sad su i mrci došli na red i to mućki. navodno se u muću tri oli četri mrca nisu mogla pokopat zaradi ovih vremenskih neprilika tri oli četri dana i sad poteštat kerum kaže:

"split nije grad slučaj. u muću se mrtvaci nisu mogli pokopati 4 dana, pa to nitko nije govorio"

e pa lipi i šesni naš žeki split nije grad slučaj, ali slučaj ste vi. jeste i to za promatranje. jerbo, normalan čovik ne bi izjavija da je sve normalno ako ne voze tantobusi, škovace se ne odvoze, ljudi se lome po ledu (ne zaboravite da ih je bilo skoro iljadu), skule ne rade, hitna ne more do bolesnih i slično.

i u doba rata su skule radile, dušmanin nan o' splita nije učinija ono ča ste vi uspili. danima se govorilo da će snig i to veliki snig. šta niste pitali u svoga kumpanja bandića kako se zagreb organizira kad je mećava. šta se može poduzet? triba li tražit pomoć od kontineta. razmislit šta može napravit čistoća. s čim se raspolaže. šta triba nabavit. itd.itd itd.

najlakše je pozirat i blebletat, pokazivat svaki dan novu jurilicu. to može svaka budala. a pametan čovik će pamet dokazat kad uspije organizirat grad i u nemogućin uvjetima. ponavljan, jemali smo mi i rat, pa su skule radile. koliko van dan već dura snježni dan, a? pritvorija se u snježnu šetimanu, a ako ovako nastavi, dogodit će se i snježni misec. split nije muć, to je drugi grad po veličini u lipoj našoj; građani plaćaju prirez i komunalije, poreze uplaćuju tvrtke i izvolite raditi posal za koji vas plaćamo. ili tako ili odstupite.

u mom dvorištu

e... pa je novi snig. jake snage iz iz portuna mažuranićevo šetalište 8C potpomognute snagama iz susidnih portuna su svoju ulicu očistile kako slidi:

ovo je naš dvor, čistili smo ga jutros od nekih 7:30 do 11. kako smo uspili? jučer pozapodne san vidila na mailu u onim newsletter oli reklamama koje niko osin mene ne čita da lopate za snig jema u konzuma na sirobuju i poslala san pricidnikovicu da odma nabavi nekoliko. ona se narafski prema uputama nevenke bečić uzdala u nećake i nećak je pribacija na sirobuju. uspila je kupit jednu, ali vridnu. zašto nije vazela više? jerbo, sve su se rasprodale dok si reka keks. onda smo se skoro svi radno sposobni, pa čak i oni stariji ka ča je moja mater, jutros spustili u dvor i metle, lopate, škovacere, kajini, motika i uspili smo! naša ulica je čista i posuta. do nas možete i na noge i tonobilom. 

a ovo doli je tolstojeva, nju će valjda očistit sunce. kad izađe. jerbo, u grad split se ne uzdan.

cokule

cokule by xvii

ma ko kaže da splićani nimaju postole za snig?! moja dva para cokula, livo legendarne koje su prošle snigove i države i desno nove, kupljene prikjučer, i zasad su najdalje došle do bena i to danas :D

međedsko pitanje :)

eto tako medvid (po spli'sku) oli međed (po valjda ličku) pita.
 a jeste li vi očistili svoj snig, a? i led, a?