o uredu, stolu, žutoj zbirci, ma zapravo o životnoj filozofiji

ured by xvii

e... zadnjih dana san najviše tu.
ovo je moj ured.

pari jednostavan, a?
razočarani?

očekivali ste velike fotelje?
e pa meni to ne triba, nisan ja ex pricidnik mesić.
šta će mi velike fotelje, niman namjeru strašit svit.

najobičnije katrige, jedan cvit, koja slika,
laptop, printer,
škancija s librima, tv, linija, kauč (drugi dio ureda, ne vidi se na sliku)
i to je ka to.
još armerun i stol(ovi).

stol ima posebnu važnost.
to je moj stol i iako pari skroz običan,
meni vridi beskrajno.
zašto?
zato ča mi je dobro doša za finit pučku skulu oli kako se danas zove osnovna.
zato ča mi je dobro doša za finit srednju skulu.
zato ča mi je dobro doša za finit fakultet.
zato ča mi je dobro doša za magistrirat.
zato ča mi je dobro doša za radit i zaradit.
zato ča mi je dobro doša za učinit koju crtariju i slikariju (http://xvii.exto.org)
itd.
malo san ga piturala kad san krenila u posal i ka novi je.

na njemu famozna žuta zbirka.
fizika.
stiže učenik.
počinje radni dan.
jesan li van rekla da je to baš moja žuta zbirka?
ona ka san ja odila u skulu.
nisan je ka neki bisno iskidala kad je finila skula, ma ke, e...
iz nje san ja naučila i sad druge učin
(http://www.instrukcije-split.com)
kroza godine je požutila skroz (mojoj žutoj zbirci ime stoji tutokompleto),
ali durat će mi još.
naučila san stotine učenika fiziku iz nje.
i još ću.

ovo je slikano jučer.
narafski da radin i danas.
stiže oni isti učenik ča je bija i jučer.
danas mu triba pokazat drugi predmet.

narafski da radin i sutra.
i najprvo ću učeniku od jučer i danas pokazat matematiku.

e a šta ćete, ja ne mogu ure i ure ubijat na rivi po kafama i kukat nad teškon sudbinom.
moj život ima nikoliko srića, jedna od njih je moj posal. (http://www.parametar.hr)

ajmo ča radit. u radu je spas.
linčine je šjor dante smistija u pakal i nije falija.

bija je ovo tekst o uredu.
bija je ovo tekst o stolu.
bija je ovo tekst o žutoj zbirci.
ma zapravo bija je ovo tekst o životnoj filozofiji.
mojoj.


ps - tu (uglavnom) nastaje i www.xvii-online.org