bi li ga poznali?
evo kako izgleda dva dana nakon udomljenja :)))
imala san špurijus da će bit super mačić i vidin da nisan falila...
špiro by xvii - klik za veće
inače danas san bila u dm-a i donila doma 8 važi za maške, 2 vrićice pijeska za maške (svi me ovih dana pitaju, pa evo da van rečen. maška se pere sama i nima čišće beštije, a potribu čini u pijesak, zatrpa, to se pokupi lopaticom i isto nima problema. odma nauči di će činit potribu i nije ka kod štenaca da ih triba učit. maška van zapravo sve skonta sama. ja moje maške sigurno nisan naučila otvarat frižider ni baratat kvakama od vrata, oni su samo gledali u mene i narafski da i to znaju. znaju i sve armerune otvorit i još puno tega), spizu za mališane, kesice sa komadićima mesa za veliše, male paštetice za svih, velike i male, štapiće za grickanje za mašku isto i jedan kaladont i tekući sapun za ljude. hehe više za njih vengo za se... dobro, ovo san in učinila zalihe za par dana, pijesak će bit i za više.
a ne kupin za njih samo dm vengo i u konzuma i u butigu od beštija itd.
dosta dan i macama koje su vani, pa more bit da san mogla jemat još jedan tonobil, ali čemu? i oni ča ga jeman mi višje stoji isprid kuće vengo ča ga vozin. u dvi godine učinija 4200 km - četri iljade i dvisto, dobro ste pročitali. možda san mogla pineze stavit u banku, pa skupljat kamatu. možda san mogla uložit u još koji poslić oli dionice i sl.
e mogla san ovo i ono, ali sve to me ne bi opče veselilo, pa šta će mi onda?
od materijalnoga bi mi jedno veselija jedan brodić, drugo ne.
a beštije pruže puno radosti. ka dite san tila jemat pasa, a na kraju pasa nikad nisan imala, a maški evo koliko očeš. uvuku se pod kožu, drage su i mile, ko bi im odolija...
narafski, nećemo dalje ovod samo o maškama notavat, jeman ja još dosta hobija, zanimacija, događa se i u splitu dosta toga, ali o cukriću i špiru je stvarno tribalo izvistit svit jerbo miritaju, e.... :)))
Nema komentara:
Objavi komentar