uradi sam, pituravanje, dil prvi

e... ne volin baš piture. zaradi čega, a? evo zašto, e...

• obavezno naprave poveći nered,
• svaki dan oče poveći obid,
• za njih triba istrest iz takujina poveću hrpu pinezi,
• šetaju po kući simo tamo i triba ih tirat da rade (čast vridnim iznimkama),
• ne misle da jeman maške i ostavljaju otvorena vrata da maške uteču, a i otvorene ponistre da maške padnu s petoga poda i onda im ni devet života ne bi bilo od pomoći,
• šporkaju,
• pituraju ka mačak repon i uradak im dura godinu dan, poza tega se počne sve cvitat i otvarat, a da su napravili posal kako triba pitura bi tribala durat sedan do deset godin itd.

nije mi teško radit i onda kad triba piturat ne zoven vraga ča se pitur zove, vengo to lipo sredin sama. narafski, piturat je najlakše, najprvo sve triba dobro pripremit. danas pričan o pituravanju zidova i štropova, vrata i ponistre su druga štorija. priprema za ovo oče reč:

• sastrugat staru pituru koja je sagnjila,
• počepit bužice,
• pobrusit ugrubo,
• pobrusit ufino,
• sve dobro oprat itd.

od stvari će van tot svakako tribat

• dobre skale,
• stari foji,
• špatula (neka bude oštra),
• karta-devera,
• sredstvo za počepit bužice, gips more, ali će s vrimenon i popucat, puno je bolji jubolin

a valjci, pineli i pitura (najbolje jupol i najbolje bila jer je s njon najlakše radit i najlakše je poslin popravit ako se nešto kroza godine zašporka - daklem, ne trošite na pigmente, ne mišajte, šta fali biloj koluri, a?) tek poslin dolaze na red.

ružno vrime, kiša, pa se jutros se u mom životu nije događalo ništa spektakularno. sve ča je bilo je skidanje stare piture sa jednega štropa jerbo ću ti dil stana piturat kad sve dobro pripremin.

narafski, svi su kumpanji tot kad nada triba otvorit takujin, častit, pomoć, riješit probleme, slušat, itd., a kad triba radit, onda svi uteču u mišju bužu. tako je jutros bilo mira i mobitel mi nije zvonija. nima veze, šta me briga koga nima, brez svih se može. napravila san i višje vengo ča san mislila za danas.

evo gren dat par savjeta svima onima koji su vridni i koji bi tili sami napravit nešto, a ne samo čekat da neko drugi riješi sve probleme.

daklem, danas dilin savjete za struganje stare piture. gletanje i pituravanje ćemo drugi put.

• raširite stare foje da poslin bude lakše čistit.
• prisvucite se u staru i udobnu robu. stavite kakvu staru španćjeru oli napravite kapu o' starih foja. nije loše jemat i maskicu priko justa ako vam smeta prašina.
• skale namistite dobro, ne jušto ispod mista koje triba sastrugat vengo mrvu dalje da jemate mogućnost normalnog upiranja i da vam stara pitura ne pada u justa i joči. narafski, skale moraju bit i stabilne da se ne izvrnete i ne polomite.
• ono ča gre samo neka samo i gre, a ako očete očistit sve, onda ono ča malo teže gre namočite vodon, voda će sve omekšat i olakšat će vam posal, to je obično kredna pitura i voda je skida.
• ako nešto malo teže gre, zamislite neprijatelje, bivše, partije, političare i sve one mustre koje su van u životu napravile neko zlo, pa ćete vidit kako će sve otič. danas san zamislila skoro cili hdz i tako san napravila duplo posla, hehe :)))
• struganje zida je svakako lakše o' struganja štropa i oko tega ne bi tribalo bit problema.
• pacijenca je važna, s njon se sve postiže. pomalo i napravit će se.
• poza struganja sve lipo počistite i popijte limunadu, još malo i sve će se sredit, pa ćete jemat lipo pituranu kužinu, banj, kamaru...