kašuni

kašuni by xvii - ko ovo more platit, a?

e... ovo su litrati od jučer pozapodne. narafski da san se kupala. danas živin od sićanja na jučer jerbo me pozapodne toka dicu učit letriku, pa ćemo na kašune jopet poč koji drugi dan. za one ča ne znaju kašuni su jedna od najlipših plaža u splitu, podno merjana. split je narafski jedan od najlipših gradova na svitu, morete onda mislit koliko je tot lipo. pari da ste utekli od svega kad ste tot. najpogodniji su za plivanje dok je recimo za surfanje svakako pogodniji kaštelet oli žnjan. kašuni su misto di je prilično teplo, tot se more normalo kupat od recimo kraja aprila pa tamo negdi dok ne počne zima koja narafski i kod nas počne i to ako počne oko božića, ali za ne dobit pleuritu i ne umrit, fermajte negdi oko dana mrtvih, otprilike šest miseci u moru je sasvin dovoljno. najlipše je na kašunima kupanje u peti misec i u deveti, deseti. bude uvrj glave tri četri čovika i praktički cilu ovu krasnu valu jeman za se. u sedmi je tot prikovišje vruće i poveći konfužjun od tonobili tako da u je sedmome možda bolje nač koje drugo misto, a oni ča ga ti misec ne toka radit i ča more vazest urlap i poč negdi kakvin brodićen je najsritniji. za ostale misece moremo reč ča će mi copacabana, jeman ja moje kašune. ekola, gren ča, stojte mi dobro.