znan da se s nestrpljenjen čeka nastavak ove štorije. danas gre banj i njegovo visočanstvo u temu banju. dalmatinac u banju, to van je poprilično vesel događaj, a gre jušto ovako.
dakle, kad van njegovo visočanstvo dalmatinac tipični ulizi u ti banj oli kupaonicu morete očekivat uragan. njegovih mudanata, sokolske, bičava i druge robe bit će na mašini (ne u vengo na), ali ne samo tot vengo i po tleju. u kofu oli vriću za šporku robu mu ne pada na pamet stavit robu, e... a zaradi čega bi to činija, a? paaaaa to će te vi, zato vas i jema, zato vas i voli najviše na ovemu svitu. narafski to svi znaju, samo će vama teško kad priznat, e... ćutite to i brez da van reče i eto sriće. narafski, srića van je uvik dodatno obogaćena i sa ovin: ako je tipični, tipično je i da temeljito učini okolo konduta malu potribu jerbo okolina konduta za to i služi, e... kondut je ionako bela figura, e...
kad se njegovo visočansto brije, narafski da će ostataka tega čina bit po cilon lavandinu. i narafski da mu je puno teško kad ga to toka čistit i to će radije prepustit vama. paaa puno vas voli, e, a šta ćete... prvo je to činila mater i sestra, poslin cura, žena; jubavnica neće nikad, za nju se ne triba bojat, e... no, nadajmo se bar da je neće bit, e... dakle, teško će taj ikad otvorit špinu, uzest malo vima oli arfa ili kojega drugoga sredstva za čišćenje u ruke, e... ma ke, pa on je dalmatinac tipični, ne zamaraj ga s tin, e... poslin izlaska iz banja šugamani će vrlo često bit po tleju, a ako banj nima kabinu, po telju će bit i dva prsta (minimalno) poplave. je li van sve ovo skupa dosta za opis velikoga događaja ča se zove dalmatinac tipični u banju, a? a notat ćemo još i to da obično u banju i piva. ako nećete jubavnice, nemojte mu nikako reč da se dere i da prikine jerbo on piva. ka grdelin, e... morete na me sad vikat koliko očete, morete me beštimat, morete me samo gledat i značajno činit kuco, ne povlačin se. njanci jednu rič. i nastavit će se, narafski.
-------------------
by xvii 26.10.2005.
Nema komentara:
Objavi komentar